Dama hoben di Aruba a fayece tragicamente na Colombia

The content originally appeared on: News Americas Now

Black Immigrant Daily News

The content originally appeared on: Diario

ORANJESTAD (AAN): E tabata un dama cu for di hoben caba tabatin su futuro plannan den cabez!  Como cu e stima animal asina hopi, su meta tabata pa bira veterinario den futuro.

   Ta trata aki di e dama Marilyn Cardona, un dama naci na Aruba y cu a crece riba e isla.

   For di tempo cu Mari tabata bay scol basico Rosario College na Playa, e tabata bisa esey, pues cu

e kier bira veterinario.  Cu su personalidad amical, hopi social, y demostrando su inteligencia, el a yega na Maria College MAVO unda el a sigui aumenta su circulo di amistad.  Despues el a sigui pa Colegio Arubano, cual el a finaliza cu exito.

   Su educacion avanza a hibe na Colombia, unda el a sigui su estudio pa bira Veterinario na Universidad Santa Rosa de Cabal, conoci como Unisarc y cu ta situa na Chinchiná, na departamento di Risaralda na Colombia.  Esaki ta e departamento cu tin Pereira como capital.

   El a sigui su estudionan di Medicina Veterinario cu exito, y poco tempo pasa el a obtene su titulo universitario.  Hopi contento cu esaki, e dama a dicidi cu e ta keda par di luna mas na Colombia, den e bario El Vergel unda e ta biba, pa caba di bende tur su cosnan pa asina na Januari 2023 e regresa Aruba.  Su famia- y amigonan tabata contando e dianan caba, pa asina habri un epoca nobo cu Marilyn tey cerca nan y awor cu e titulo di Veterinario.

   Accident na Colombia: Noticia for di Pereira ta indica cu sinembargo destino a dicidi otro, ora cu Diasabra merdia, Mari a subi su motorcycle Yamaha 125cc pa bay haci un diligencia.  Ora Mari ta coriendo riba e caminda di Belen pa Remolinos, banda di e bario di ‘La Argentina’, el a bay dal semi-frontal contra un Truck modelo Chevrolet FRR color blanco.  El a dal den e banda dilanti parti robez di e Truck, kibrando e housing di luz, y su curpa kizas a dal den e spiel tambe.  Despues di e impacto, e motorcycle a keda banda drechi di caminda den pida yerba.

   Mesora a bati alarma, y Polis como tambe personal di Rescate di Cuerpo di Bombero local, cu a atende Mari gravemente herida eybao, y a dicidi na hibe cu urgencia pa Hospital San Jose.  Como cu e golpinan a ocasion trauma severo na su cerebro, eynan a dicidi pa hibe pa cuido mas specializa pa Hospital Universitario San Jorge na Pereira.  Sinembargo durante e traslado aki, el a fayece debi na e heridanan severo aki.  Asina Docter a constata morto di Marilyn Cardona, naci dia 22 di April 1996, pues tin 26 aña di edad.

   E golpi fuerte na su cabez posiblemente ta bin di e impacto cu e parti duro di e truck.

   Su noticia di accident fatal, a dal su famia y su amigonan masha duro mes, tanto na Colombia como na Aruba.  Increible pa pensa con un hoben cu asina yen di bida, apenas 26 aña y ya cu un titulo Universitario, y cu mision pa cumpli cu su soño di bira Veterinario, awor a evapora asina rapido.

   Su amigonan na Aruba a bisa cu semper nan lo keda corda Mari como e persona alegre cu e tabata!  Hopi stima na scol, pa su docentenan, y un persona kende semper tabata cla pa yuda ki ora cu tabata por.

   Na su mayornan, John y Lucy, y Cristian, Camilo, demas famia y su amigonan, DIARIO ta manda su mas profundo palabra di condolencia.

NewsAmericasNow.com